昨日港股即日完成調整，並喺22,000點樓上收市，繼續呈大漲小回嘅局面。由於今轉恒指確認突破22,000點，而且有資金流嘅配合，唔似係散貨格局，故認為值得加入「好友」行列。若然閣下唔知從邊啲股份類別落手，可以留意恒指牛證。
高盛轉軚力撐滙控
資本市場永遠係最現實嘅，曾幾何時對大笨象有咁盡踩咁盡嘅高盛，最近發表報告話，大笨象係少數尚未完全估值正常化嘅亞洲區銀行，所以，重申其目標價為122元，評級為「確信買入」。
偏偏昨日升市，滙控股價卻逆市向下，全日跌0.5元，收報89.7元。係咪大戶未收夠貨，不得而知，但滙控現價距離高盛嘅目標價尚有約35%上升空間，這對後市到底有何啟示，倒值得深思。
市場憧憬嚟緊出口市場會有較明顯嘅改善，與出口相關嘅股類繼續受到資金追捧。阿莊早前推介嘅大連港（02880）升4.89%，收報3.22元，但由於組合已持有廈門港務（03378）及天津港（03382），所以未有跟進。不過，筆者好幾次叫大家睇實嘅富士康（02038），近日就真係開車，冇理由叫人買自己唔動手，所以昨早分別以6.07元及6.2元各追入三萬股。
內房成A股火車頭
A股走高，滬綜指好不容易重上3,000點關，內房股成領頭羊，萬科A（000002）升6.8%。事實上，喺今轉升浪中，內房股表現落後。嚟緊恒大（03333）公開招股，有多位大孖沙開腔力撐，似乎許勝不許敗，唔排除可以帶動整體內房股表現，故昨日以平均價16.9元，買入中國海外（00688）3萬股，目標上望20元大關。
市況利好，唔少股份都趁機突圍而上，就如阜豐（00546），昨日又升逾7%，收市報3.6元。阜豐上半年純利已超過去年全年純利，除了味精業務持續增長之外，旗下黃原膠產能亦進一步提升，由於黃原膠除了應用喺食品製造外，亦可應用於開採石油，近期國際油價升勢加快，有利石油開採，其黃原膠業務亦可直接受惠，炒作概念亦隨之而來。
既然阜豐股價已確認完成歷時三個月嘅收集期，爆發力不容小覷，可睇位順勢而為，博快見4元，穿3.25元止蝕。