本文重點
滙豐中國翔龍基金（00820）公布咗會回購單位股份之後，股價升得唔錯，證明市場好Buy，好多人都預咗尋日嘅舉手會一定冇問題，點知太過老定，最終係唔夠人開會，於是要十五日之後，再通知股東新嘅股東會時間。
滙豐環球投資管理董事兼亞太區策略業務發展主管謝國誠話，機構投資者大約持有基金10至11%，佢哋好支持回購。佢認為今次唔夠人唔會對回購安排有影響，至於乜嘢價至會出手回購？佢就話若果長時間出現20至30%折讓，就會密切關注。
回報靠資產增值
完場嗰陣有股東嬲嬲哋投訴無息派，不過謝國誠話○七年上市嗰陣，一早已經講明無計劃派息，因為新興市場基金多數回報都係體現喺資產增值方面，不過佢都補充話，咁都唔一定代表唔派息，下年七月佢哋經QFII投入內地嘅錢可以解禁拎返出來，到時就可以提高靈活性。