本文重點
無幾耐之前，3萬蚊呎嘅一房單位先至啱啱破完世界紀錄，又輪到7萬蚊呎嘅單幢物業，熱錢過剩搞到香江豪宅炒到飛沙走石。金管局苦口婆心，勸銀行承做按揭唔可以太狼，筆者收到風，已經有大銀行準備下個月，減少做以拆息為基礎的按揭條款，但今時今日，內地大款買香港豪宅，已經像女士買名牌手袋一樣，變了炫耀身份地位的方式，係咪會因為按揭畀多一厘半厘就唔買？睇怕唔會。況且上萬蚊呎價嘅豪宅供應其實有限，佔香港私樓市場比例1%左右，十三億人口嘅祖國，只要有0.001%嘅富豪想來香港買個「手袋」，經已足夠吸乾未來十年八年億元以上豪宅的供應量。
微軟視窗軟件Vista，三年前雷聲大雨點小地登場，市場反應差到極。下星期，欲洗脫Vista惡名的Windows 7將正式登場，去年測試版推出後，行內叫好叫座，電腦行內都磨拳擦掌，希望Windows 7的推出，能夠挽救受金融海嘯衝擊，今年出貨量呈科網熱後首次倒退的電腦市場。
史提芬之前推薦過的機殼股巨騰（03336），尋日升6%，內地PC界一哥聯想（00992）一樣唔弱，升5.2%收市，再創金融海嘯後新高。
柳傳志出山顯功力
聯想的元老級人馬柳傳志，早前復出，揚言今次主要目標係壯大核心資產，計劃三至六年後，把聯想整體上市實現之後，屆時就會再交棒。唔知係行運醫生醫病尾抑或這中國電腦業神人真的能力非凡，接手後，聯想第一份成績表已經有重大轉機，股東虧損1,600萬美元，但撇除重組費用及一次性項目，實際有接近1,300萬美元經營溢利，扭轉去年巨額虧損的形勢，而且，全球市佔率逆市微升0.4%去到8.6%，可見比其他大品牌，更為出色。
一○年度（三月結）早段失地太多，加上市場估第四季開始PC市場才有較明顯好轉，估計一一年聯想市盈率回到二十二倍左右，唔算十分之平，但對比歷史估值三十一倍左右，未算是高不可攀。考慮到業績剛虧轉盈，仲有反彈空間，加上Windows 7推出引發的炒風，短線升勢，應是有餘未盡。