本文重點
「警訊」睇得多都知道，依家不少人都會冒認其他人招搖撞騙嚟呃錢，所以做名人真係要小心啲，至於收到所謂名人電郵嘅仁兄，就要更加倍小心。最近就分別有人發出兩封署名滙控（00005）執行董事兼環球銀行及資本市場業務主管歐智華，同埋恒生銀行（00011）執行董事兼財務主管陳國威嘅詐騙電郵，大家認真要小心！
賊人冒充招搖撞騙
電郵主角之一嘅「陳國威」，今年上半年已轉投新地（00016），唔再係恒生高層，但電郵竟然用番恒生嘅Title，證明呢封電郵係幾咁假，發電郵嘅人亦認真唔夠專業，係笨賊一名！太子記得當時恒生就呢件事，已通知銀行保安部，亦有報警處理。
滙豐嗰邊都見過唔少呢類電郵，有時係冒認不同嘅高層，今次就輪到歐智華。大家都知呢啲騙案往往係呃你過一筆數畀佢，話之後有得退番，結果？當然係賊人逃之夭夭。太子呼籲大家，收到呢啲電郵，唔好以為金融界名人睇中同你合作，查實係賊佬睇中你就真！