筆者一直對今年十月同第四季的市況頗感樂觀，事關對比去年金融海嘯最惡劣時刻，期內企業盈利基數低，金融機構更要為信貸投資工具價格下瀉大幅撇帳，對比之下，今年第四季度業績肯定會有驚人的回升。至於近日股市氣氛唔好，問題反而在於三至八月份環球股市大升，業績谷底反彈的因素，或多或少已經在股價身上反映。

上周五美國公布的就業數據麻麻，九月份非農業職位再流失26.3萬個，比原來預期的17.5萬多，失業率9.8%，更係去到廿六年高位，擁有1.54億勞動人口的美國，幾乎有十分之一，即差不多1,540萬個打工仔唔見咗個飯碗，相當於香港人口兩倍，諗落都幾得人驚，但係股市反應平靜，睇嚟對政府退市充滿戒心的投資市場，樂於見到美國經濟，尤其就業市場唔好太強，以便享受多一陣子的低息兼水浸日子。

豪宅價升得有道理

樓同股票，經常都係揸咗嘅人睇升，無貨嘅人想佢跌，筆者有個堅持只租樓唔買樓的死硬派老友，話唔明點解港人收入中位數，十年來升幅有限，但豪宅呎價就可以一萬變二萬，二萬變三萬咁飆升。

筆者乃數據信徒，打工仔薪酬中位數，近年確係無大進帳，○九年第二季係10,500蚊，只比○一年輕微多出500蚊。當然，無法量化多少內地大款，以擁有一間香港豪宅，作為顯示成功的象徵，但大部分人可能忽略，半數港人入住公屋或居屋，私樓市場針對收入較高的一群，條數就唔係咁計。

金融及服務業興旺，中產家庭近年迅速增長（以家庭每月收入50,000元以上計），過去八年大升兩成六，去到26.96萬個，當中家庭每月總收入10萬元以上的，更達6.57萬個之多，而香港大單位供應，說的是100平方米（約1,076平方呎），每年不外乎是一兩千個，現在總量有79,400個，對比中產家庭數目及增長，顯然僧多粥少，供求失衡，豪宅自然節節上升。

上蓋物業穩賺不賠

可惜香港沒有一個發展商專做大面積物業及豪宅市場，政府勾地政策，變相吊高嚟賣，除非像新地（00016）、恒地（00012）般擁有龐大土儲，否則樓價再高也只係蜑家雞見水。

港鐵（00066）是筆者至愛，也是樓價上升受惠者，大量地產項目作為鐵路運輸補貼，在追求交通便利的普遍買家心態，發展上蓋物業幾乎是穩賺不賠生意，唯一是1.45倍的市帳率，甚至高於一線地產股，如果短期大市回得再深一點，見1.3倍，大約23.6元左右，相信會係另一次中長線入市好時機。