近期阿莊減持股份套現，看來策略正確。新股熱潮不再，乃股市調整嘅先兆。上周三掛牌嘅華南城（01668），上周五收報1.57元，較招股價低25%；上周五掛牌嘅恒盛地產（00845），亦較招股價跌14.5%。聽聞想捲土重來搞IPO嘅恒大，擬於本月進行全球路演，下月上市，能否成事，真係要聽天由命！

大連港（02880）宣布擬發行A股以及獲母公司注資，可惜上周五遇上大跌市，股價冇咩反應，收市報3.15元，跌1.25%。

大連港係做油品、液體化工品、集裝箱及汽車等碼頭及相關物流業務，以及港口增值服務，逾九成收入來自內地。今年上半年，公司純利同比倒退49%，至2.72億元（人民幣．下同），其中集裝箱碼頭等業務下跌幅度較大，事關期內黑龍江、吉林和遼寧三省對外貿易值下跌11至27%不等。

截至六月底，大連港總負債44億元，手頭現金及等值10.15億元，經營業務現金流淨額2.28億元。最近，公司公告回歸上海A股市場，擬發行不多於12億股A股，雖然發A意味H股股東權益會被攤薄，但由於公司得以擴大股東基礎，加上接通了內地資本市場，有利日後參與內地港口業務整合，故H股股東不應只看眼前虧。

發A有利業務發展

同一時間，大連港宣布擬向母公司發A股，以收購礦石碼頭、雜貨碼頭、散糧碼頭，客運滾裝碼頭及相關物流業務，以及港口支持業務，初步代價為28億元。

若然上述建議獲得通過，大連港將成為首家同時在中、港兩地上市嘅內地港口營辦商，公司將完善整個港口業務產業鏈，大大提升競爭能力。

事實上，以大連港作為東北第一大港嘅特殊地位，戰略意義甚大，公司是次進行兩項大舉措，有助進一步鞏固港口業務，亦可藉着涉足與內需關係較大嘅散貨碼頭業務，減輕對集裝箱碼頭業務嘅依賴，加強抵禦經濟波動嘅能力，整體發展趨於正面。

照計股價喺3元邊應該唔怕買，待明年港口股經營環境漸趨明朗之後，此股可有一番作為。