事隔三個季度，恒指終於重見2字頭，不少蟹貨重見天日，但好多國企股早已創完新高又新高，一句講晒：游資太多，金管局要不停注資，銀行體系結餘衝破2,000億元，同豬流感患者數目一樣，一日高於一日。「新股王」金隅（02009）都算益街坊，認12手即起碼有1手，資金炒完新股何去何從難料，20,000點樓上是否值得再下注要考膽識，「四叔」原本明言20,000點樓上每升1,000點即減持一成，但昨日亦話見勢好決定轉軚，閣下唔使擔心會接咗四叔手貨。

微軟跑輸科技股

其實港股昨日表現已算唔錯，事關微軟、亞馬遜同美國運通等業績都唔好，場外交易報跌，連帶美股期指亦偏軟。納指已連升十二日，會否因微軟而「斷纜」，見報之時應已知結果。不過，大部分科技股業績都好過預期，反而「龍頭大哥」之微軟卻看淡未來前景，唔通真係眾人皆醉我獨醒乎？

其實美國嘅經濟數據並非一面倒向好，六月份二手房銷售增長3.6%固然振奮人心，但新申領失業救濟金人數則增加3萬，市場氣氛好，對壞消息麻木，反而着眼於持續申領失業救濟金人數下跌；不過，申領失業救濟只有半年限期，好多人並非唔想領救濟金，只係冇此資格而已。

內地股市繼續牛氣沖天，滬綜指再升1.33%，收報3,372點，呢類「慢牛」式上升遠較港股健康。中國建築同四川成渝A股上市在即，首日掛牌肯定搶到天高，現時A股平均市盈率已接近三十倍，由低位亦已回升逾倍，但此類消耗性上升，仍予人有餘未盡之感。

重組進入大直路

中航科工（02357）最近連番有好消息，旗下A股昌河宣布將轉虧為盈，另一A股附屬洪都已停牌，等待宣布重大交易，應係有重組方案。現時買定中航科工，值博率不俗。

另一方面，中國本周宣稱再推動央企重組，中航科工母公司新中航工業去年底已重組合二為一，但預期將會有更多大動作，其在內地及香港共擁有21家上市公司之多，但僅得H股的中航科工為境外上市，作為融資平台的角色呼之欲出，亦可憧憬獲注入更多優質資產。

中航科工早前已獲通過出讓哈汽集團100%權益和昌河鈴木10%權益，為重組跨進了一大步，下半年目標是將餘下汽車資產（東安動力）剝離，並尋求向母公司收購更多民用航空產品業務。