最快今年有得睇

美國時代華納旗下AOL及A Squared將聯手創作，一系列以知名人士為主角嘅網上卡通片，包括美國家政女王斯圖爾特、已故美國太空人薩根等等，而最矚目嘅當然係股神巴菲特都有份參與。

巴菲特將會喺一套名為《神秘百萬富翁的會所》嘅卡通片擔任主角。喺套卡通片裏面，巴菲特將化身一名導師，教授一大群小朋友做生意嘅技巧同埋金融知識，片長大約三至五分鐘，並將於今年內或明年初喺網站率先播放。

巴菲特話，能夠參與卡通片嘅製作，自己都感到好興奮同雀躍，仲話無嘢好得過教識小朋友財務責任。

巴菲特嘅眼光有目共睹，舊年九月金融海嘯爆發期間，投資旗艦巴郡購入價值約50億美元嘅高盛優先股及認股權證。日前高盛股價突破162美元，巴菲特持有嘅高盛認股權證，不足一年就勁賺44%。