昨日中資金融股表現亮麗,交通銀行(03328)升5.2%,報9.64元,中國平安(02318)及中國人壽(02628)分別上升2.4%及4.9%。
光大控股(00165)亦有好表現,收報22.45元,升7.9%,阿莊嘅持股帳面回報率已有28%,而另一隻持股中保(00966),股價喺突破20元後現回吐,收報20.45元,跌1.2%,若有跟進者,想睇位獲利,可留意公司改名正式生效前後嘅出貨機會。
講起中資金融股,其實兼具金融及海西概念嘅閩信(00222),走勢亦算落後。閩信本來係福建省政府直屬企業—福建投資旗下公司,今年初大股東進行合併重組,五月起,公司改由一家新嘅國有企業—福建省投資開發集團持股41.6%。
手頭資產潛質優厚
阿莊之所以說閩信有金融概念,乃指其持有廈門國際銀行36.75%股權,並全資擁有閩信保險。早前公司已經證實,廈門國際銀行已開始股改,但只處於非常初步階段,而上市係發展方向。
除了金融業務之外,閩信還經營房地產開發,旗下位於蘇州市嘅「水岸明珠」房地產項目,正爭取喺今年底完成主體工程建設。另外,公司又長線持有華能國際(00902)7,200萬股發行流通A股,單計呢批持股市值已達6億多元。
相對於公司市值16億元,閩信截至去年底止手頭現金及等值2.6億元、資本負債比率(總借貸除以資產淨值)僅6.4%,現價未能充分反映資產價值。之不過,呢隻股股價較NAV(昨日收市報3.59元,截至去年底止NAV為4.89元)存在折讓非一朝一夕嘅事。
要改變呢個現象,也許需要喺業務發展上作出突破。上月底,公司宣布,由大股東福建省投資開發集團嘅董事長翁若同坐正公司主席之位。相信喺主要人事變動底定後,下一步便會着手強化業務基礎,以配合海西區嘅發展步伐。
資料顯示,福建投資開發集團旗下資產超過200億元人民幣,包括擁有在建嘅福清核電站一成權益,未來尚會參加多個新能源項目,包括兩個新核電站項目。
睇牌面,作為福建省政府旗下嘅窗口公司,閩信日後有望獲得注入優質資產。至於何時能修成正果,就要考考小股東嘅耐性。
銀基中長線可取
阿莊喺周三推介嘅銀基(00886),去年度稅後純利達到4.15億元,按年增加約6.6%。聽聞本年度以來,旗下白酒產品售價錄得雙位數字增長,公司正爭取喺年底前落實經銷其他白酒產品,另會積極研究引入經銷海外紅酒產品業務,業務發展唔錯,中長線具留意價值。

