24/07/2009

播放本新聞相關短片
 
股價號碼: 

分析員同行非敵國

所謂同行如敵國,太子一直以為財經人士為咗搵大錢爭上位,每個人實係面和心不和。點知早兩日太子同幾位財經專家歎下午茶,發覺佢哋唔單止好Friend,仲互相傳授賺錢秘笈。

太子近日同恒豐證券董事長張華峰、恒豐證券研究董事林家亨、富昌證券總經理藺常念、信誠證券基金經理王海翔喺中環歎茶,太子一邊食奶醬多,一邊聽佢哋分享對復星國際(00656)嘅睇法,齊齊研究買唔買得過?之後,王海翔又教張老闆玩窩輪同牛熊證的竅門。人哋話「知識就是財富」,但太子見到佢哋毫不吝嗇自己嘅知識,反而互相袋錢落對方嘅袋,就係有錢齊齊搵。

隨傳隨到幫手開Talk

之後,藺常念同王海翔就以香港專業財經分析及評論家協會嘅會長同理事身份,去銅鑼灣講投資Talk,由於當晚聽Talk人數突然增多,於是藺常念(行內稱他為會長)就急Call同屬呢個會嘅耀才證券市務總監郭思治到場,轉眼間郭Sir以一身運動Look出現,佢仲話:「本來我喺屋企做緊運動,一收到會長電話就即刻出門口,連衫都無換啦。」

太子仲收到風,佢哋平時除咗搞免費講座,仲會約埋其他會員(全部都係大家熟悉嘅財金專家)一齊去遊船河、行山、BBQ、打籃球同打網球。嘩!真係估唔到佢哋私底下咁鬼Friend。