美國企業業績較市場預期理想，美股上周大升，帶動港股做好，恒指重上萬八點之上。預料本周升勢或持續，除咗一線股份表現回勇，二三線股仔亦重現鑊氣，志強所持的中電能（00735）雖然暫時遊緊船河（坐艇），但相信今個星期有運行，應可錄得盈利安全落車。
金隅（02009）公開招股又刷新超額認購紀錄，近日新股人氣之高，其他股份望塵莫及。琥珀（00090）無論在超購倍數或首日掛牌表現，暫為所有新股之冠，主要係此股供應有限，集資額細，莫講話有咁多街客捧場，單係一個半個基金，都可以買起成間公司。
琥珀晒士細細，令貨源極易歸邊，在炒作方面當然有一定優勢，不過最重要係琥珀食正新能源呢個熱炒概念，自然成為追捧對象。
琥珀為浙江省唯一外資燃氣電廠營運商，電廠以天然氣發電，有別於燃煤發電，是其獨特之處。以天然氣發電幾乎不排放任何微粒及二氧化硫，僅產生少量氧化氮，所產生的二氧化碳及噪音亦較少，屬環保企業，合乎國策發展，故獲政府鼓勵。琥珀未來將從事更先進的高效環保型燃氣供電業務，例如熱電聯產，其發展前景可以話一片光明。