承接港股早前的升勢，上周五恒指再度上揚，並重上18,800點水平。真係唔到你唔信，大市永遠都係同散戶嘅睇法背道而馳，好似上星期一，恒指先一度大插，但當大家看淡後市、資金開始流入熊證之時，港股就開始重拾升勢，且愈升愈有，一班熊仔熊女亦再次成為大戶點心。
其實對於港股今次升市，市場有不同的看法。有人認為，今次恒指升得咁急，係大戶營造出來，方便散貨之用；有人就認為，今次升市主要是受惠內地經濟數據支持，憧憬復甦在望所致；但亦有人認為，是次升市係受美國企業第二季度業績做好帶動。皆因繼高盛業績優於預期之後，通用汽車以及美國銀行的業績表現亦較預期為佳，令市場對及後陸續公布的業績充滿期待，成為支撐股市上揚的一個重要因素。
至於內地股市方面，上證指數似乎於3,200點具一定阻力，加上市場預期，中國建築（03311）母公司發A股一事，或將凍結資金多達16,000億元人民幣，數目如此龐大，難免令人猜測，投資者或會陸續減持部分股份套現來參與招股，故相信將為A股帶來一定震盪。