阜豐集團（00546）去年業績大放異彩，惟股價近日隨大市回落調整，尋日收報2.85元。股價回落，有利趁低吸納，可吼位於2.6元水平上車，初步目標3.5元，博35%利潤。
阜豐係全球第一大嘅味精同谷氨酸生產商，亦係全球第三大黃原膠生產商。○八年度（十二月結），阜豐營業額35.85億元（人民幣．下同），升46.6%；盈利2.94億元，大升553%，每股獲利17.75分（約20.1港仙）。現價往績市盈率十四倍，派末期息10港仙。
阜豐將繼續擴充味精同黃原膠業務，以鞏固其市場領導地位。蒙古廠房嘅生產線擴充完成後，至一○年，黃原膠嘅產量將由現時嘅3萬噸增至4萬多噸，勢必搶佔全球市場一半份額，進身全球黃原膠第一大生產商。
阜豐剛發盈喜，預期今年上半年盈利將超過去年全年，再創佳績，股價亦將同步上升，中長線揸得過。
尋日推介嘅昌興（00803）以創紀錄3億多股大成交破位而上，收報0.7元。動力強勁，有貨可揸實，短期目標0.83元不變，中線睇1元樓上。