國家主席胡錦濤提前回國處理新疆暴亂事件，A股回軟，究竟係高處不勝寒，抑或受事件氣氛影響，不得而知。昨日傳來內地銀監會規定，商業銀行理財資金不得直接投資A股，但可認購新股。顯然，中央政府知道「放水」出咗問題，正採取不同方法規管資金流向。

招行傳供股惹沽壓

從另一角度睇，無論係早前公布嘅境內國有股轉持政策，又或係今次規管商行理財資金嘅安排，不難發現，中央政府正千方百計確保A股IPO重啟不容有失，只要股市能夠順利擴容，有效吸引資金回流，由救市措施所衍生出嚟嘅潛在資產泡沫危機，便可大大減低。

市場盛傳招商銀行（03968）擬進行供股集資，昨日股價受壓，全日跌3.7%，收報16.58元。去年招行以高價收購永隆，惟其後遇上金融海嘯，金融資產價格大走樣，加上經營環境大不如前，雖然以招行嘅晒士可以啃得落，但顯然並非如當初想像般輕鬆。

若然招行今次真係供股集資，實非股東所願，亦難免予人感覺，招行股東要拿錢出嚟為高價收購找數。至於堅持收購永隆後，對公司業務發展幫助有幾大，睇怕要等三、五年才能下判語。

市況不明朗，資金追求避險之所，故見昨日藍籌股之中，公用股中電（00002）、煤氣（00003）及港燈（00006）齊齊逆市報升。

至於國企股方面，業績數據顯示，今年上半年內地汽車銷量將超過600萬輛，超越美國成為全球最大嘅車市，個別汽車股有資金追捧，東風汽車（00489）昨日逆市升6.6%，收報6.7元。不過，阿莊懷疑，汽車業榮景純由政策傾斜使然，不排除銷售高峰已於上半年出現，下半年能否靠自然增長維持，就要睇出口市場會否出現曙光。

投資收益反彈可期

講開國企股，中國人壽（02628）尋日股價表現逆市靠穩，收市報29元，升0.1元。今年以來，國指累計升幅最多達43%，但國壽同期升幅則只有33%，表現相對落後，若與幾隻一線內房股表現比較，就更加失色。

隨着今年上半年A股顯著回升，國壽的投資收益將跟隨反彈，再加上預期保險業務經已觸底，下半年核心業務收益會重納正軌，故見近月先後有多家外資大行，包括高盛、花旗、瑞銀、麥格理等，都發表報告調高國壽嘅目標價。

阿莊就相信，若然下半年A股仍然持續高企，國壽嘅估值便尚有上調空間，特別係踏入末季，今年內地經濟能否「保八」，大局已定，當大家都認同內地經濟最先走出金融海嘯，重現活力，內地保險股將再一次展現過人魅力，故除咗持倉中嘅平保（02318）外，阿莊亦建議於季內逢低收集國壽，順風順水，最快於年底前可望重見去年四月高位35元水平。