蒙牛乳業（02319）昨日復牌，並證實獲中糧集團及厚樸基金聯手入股，每股作價17.6元，取得蒙牛兩成股份，成為最大單一股東，交易涉及資金61億元。
老實講，厚樸係名牌基金，入股蒙牛，證明公司前景獲機構投資者認同；至於中糧，貴為內地糧油食品龍頭企業，入股蒙牛，可以視為進軍乳業的重要一步，亦可藉此完善本身的業務產業鏈，未來雙方更有望展開業務上嘅合作，故見市場對是次交易反應正面。蒙牛股價昨早一度搶高至21.45元，收報19.32元，升1.15%。若短線調整落番兩位大孖沙嘅入貨價，不妨留意跟進機會。
內房股自去年末季低谷回揚，唔少已重上金融海嘯前嘅價位，部分一線股份更已重上前年高位，就如中國海外（00688）、華潤置地（01109）。對此，唔少股壇老手都跌眼鏡，包括阿莊。
寬鬆政策料持續
歸根究柢，喺出口市場需時復原之下，內地產能過剩問題並非一時三刻可以解決，這迫使中央政府不斷開大水喉，變相靠股、樓二市雙引擎拉動內需，刺激經濟。喺出口市場出現明顯復甦迹象之前，相信內地不會輕言改變適度寬鬆嘅貨幣政策。
喺呢個大前提之下，下半年內地股市和樓市都處於安全期。認同呢個睇法，趁恒指喺萬七至萬八點水平整固，應好好把握收集優質中資股嘅機會。
早前阿莊喺90元樓上沽出嘅騰訊（00700），股價未見有太大調整，昨見有大行唱好，目標價睇100元。礙於呢隻股太大價，加上向上水位未必太多，故阿莊唔打算翻兜，反而將焦點轉至其他具潛力嘅二、三線網股。就如金山軟件（03888），昨日股價成功突破6元關，收報6.1元，逆市升4.2%，成交6,156萬元。由於股價才剛剛破位，相信升勢未完。
毛利率接近九成
金山主要從事製造娛樂軟件、應用軟件以及軟件諮詢服務等，其中「娛樂軟件」包括網絡遊戲、移動電話遊戲及休閒遊戲服務，去年單係呢瓣業務已帶來經營溢利3.4億元（人民幣．下同）。去年公司實現純利3.07億元，增長逾八成，毛利率達87%，可見其經營一門利錢甚豐嘅生意。
今年首季，內地經濟仍然低迷，但金山嘅季度業績冇走樣，純利達到1億元，同比增長77%，毛利率88%，而截至三月底止，公司坐擁現金及等值10億元。
展望下半年，公司精心打造嘅3D《劍俠情緣網絡版III》將正式運營，網遊業務繼續成為亮點。呢家業績處於高增長的公司，往績市盈率18倍、息率2.5厘，難怪股價高處未算高。雖然目前公司市值僅66億元，遠未及市值逾千億元嘅騰訊，但同樣係內地互聯網產業興起嘅受益者，股價表現可跑贏大市。