本文重點
富豪第二代都有不同嘅嗜好，好似彤叔（新世界發展主席鄭裕彤）兩個乖孫鄭志剛（Adrian）及鄭志明（Brian）原來係「一文一武」，大孫Adrian鍾意唱歌劇，二孫Brian喜歡踢足球，佢仲同太子講鍾意好似碧咸咁踢「翼位」，仲係阿仙奴嘅粉絲。Brian最近喜歡嘅新玩兒，就是閃避球。
Brian話玩閃避球，唔好以為「閃」開個波唔使出局就得，仲要有策略諗吓究竟幾時接唔接住個波，因為接得到，就可以令對方一個隊員出局，自己多一個隊員入局，所以一「閃」一「接」都要進退有據。Brian咁識玩，唔怪得佢做埋新創建（00659）康體活動委員會負責人。
皇馬以「天價」羅致C朗拿度，Brian笑言，皇馬同AC米蘭一樣，好似國企咁，唔理蝕幾多，總之有阿爺頂住。
里昂學師 唔怕受氣
佢大佬Adrian十一月小登科，Brian話佢做伴郎應該順理成章。佢又話老竇鄭家純好仁慈，從來唔鬧伙記，又唔會逼佢返公司幫手，佢返嚟新創建做嘢係自己選擇，因為佢喺里昂做基建分析員「學師」三年，想有機會學以致用。問到喺里昂時有無受過氣，佢就話要受過氣才得人生經驗。