03/07/2009

播放本新聞相關短片
 
股價號碼: 

股海實戰:天津港買定貨等收成

假後港股又再高開低收,表現令人擔憂。事實上,近月大市持續喺高位停滯不前,股仔炒風又大不如前,就連新股都已經大炒咗一轉,令人擔心,股市是否已屆強弩之末。

不過,基於對內地市場抱有信心,故阿莊認為,短期港股有調整唔出奇,但大幅下滑嘅可能性則可以排除。

再看投資組合,阿莊持倉嘅股票唔係跟炒股仔,係估值有數得計嘅實力股,所以唔使急住清倉。就如揸咗年幾嘅北京控股(00392),總算守得雲開,昨日高位曾見41.95元,收報41.65元,升7.62%,股價確認突破40元,可視為一個新起點,會繼續持貨。至於旺旺(00151),短線調整守住4至4.2元區域,亦會多坐一會。

資金充裕A股續強

內地A股走勢持續偏強,昨日滬綜指突破3,000點心理關口,收報3,060點,升52點,深、滬兩市總成交超過2,600億元人民幣。A股重啟IPO,創業板將於短期內推出,可以預期,A股市場將全面展開擴容,情況就如喺金魚缸投進一件大海綿,吸收市場上充裕嘅資金,再透過上市企業,將資金重投基本建設。若然第三季內地保持到上半年嘅良好局面,內地經濟可望走出金融海嘯嘅陰霾,說A股重投牛市懷抱,不無道理。

繼拋出上海、深圳、海西區等發展策略後,最近國務院又通過《遼寧沿海經濟帶發展規劃》。中央政府明確為不同地區經濟發展制訂綱領,目的係讓地方經濟各展所長,提速發展。基於這個大前提,投資者選購中資股,必須明白要順應「國策」,睇重企業嘅戰略意義,作中長線部署,別過分看重短期股市波動。

就如喺「十一.五規劃」中,已明確推動發展環渤海經濟區嘅目標,距離「十一.五規劃」(二○○六至二○一○年)完結,尚有年半,代表環渤海經濟區核心嘅天津市,正加快重組國有資產。今年三月,天津市窗口公司着手重組港口資產,便屬一例。

受惠環渤海經濟概念

天津港發展(03382)向天津港集團收購A股天津港股份56.81%權益,作價109億元,由於涉資龐大,上月中旬,天津港宣布擬向獨立機構投資者配售股份,籌集應付是項收購嘅部分現金,但尚有待定價。有關交易之通函已於上月中旬發出,預期將於本月中召開嘅股東特別大會上審議。

由於天津港專長做集裝箱業務,而天津港股份則主攻散貨領域,故投行多睇好今次收購,認為兩者可以產生「一加一大於二」嘅協同效益。至於公司為應付收購而出現資金壓力,乃意料中事。自六月中旬以來,天津港股價一直喺3.2至3.5元水平徘徊,相信正為配股定價作準備。

若本月中前天津港落實配股集資,反有助去除不明朗因素,加上市場睇好今次收購,相信股價飛升只係時間問題。可以把握入市收集嘅機會,如無意外,季內股價可突破4元大關,穿2.7元止蝕。

投資要精明 助你成為投資達人
詳情瀏覽on.cc《精明理財》

阿莊