新股認購掀起市場一陣熱潮，執筆時傳來361度（01361）國際配售部分超購逾九倍，而霸王（01338）IPO反應亦十分熱烈。究竟呢兩隻新股上場首日表現如何，仲係得個「估」字。

不過，新股認購大旺場，則惠及現成半新股，就如阿莊手持嘅中國忠旺（01333），昨日便重上9元樓上，高位曾經過見9.25元，收報9.11元，相信喺短線整固過後，10元關指日可破。

滬綜指昨日企穩喺2,900點樓上，收報2,922點，升1%。阿莊唔只一次講過，中央政府繼續「維穩」A股市場，港股衰極都有個譜。近期陸續有大行調高內房及內銀股評級，是否為新一輪大升市作好準備，不妨拭目以待。

呢兩年，金融市場風起雲湧，無論金、股、匯市走勢都曾走向極端，相信咁嘅場面，一生人唔會見到好多次。一場海嘯過後，有人歡喜有人愁，海嘯前轉持現金，海嘯後喺低位入市者，當然係受益者；但更多嘅係因為呢場金融海嘯而輸大鑊，雷曼苦主係例子，中信泰富（00267）榮太子係另一個例子。

完成配股脫胎換骨

如今，中信泰富已由北京中信接管，榮氏淡出已成定局，更趁旺市減持其他股份套現，本月上旬便按每股3.45元，配售保利香港（00119）2.3億股，套現7.9億元。完成後，其手持嘅保利股份僅餘3,900萬股，計及保利同時以先舊後新方式配股集資，該批股份僅佔保利經擴大後已發行股本僅約1.82%，即使喺市場沽清，亦毋須再公開披露。

自該次配售之後，保利嘅股價恍如脫胎換骨，雖然過去兩周港股表現呆呆滯滯，但保利股價卻反覆上揚，昨日更曾一度高見5.19元，收報4.93元。

合約銷售額勝去年

查實，保利主營內房業務，今年以來內房股氣氛明顯改善，喺消除了主要股東減持嘅不明朗因素之下，股價上升亦有其道理。

再睇保利嘅業績，去年營業額達33億元，按年增長2.4倍，其中85%來自房地產業務，純利2.22億元。截至去年底止，公司手頭現金及等值31億元，每股資產淨值3.2元，手持共逾29項目，按建築面積計約928萬平方米。

展望今年，保利新推五個樓盤，持續銷售16個項目，全年可供銷售嘅面積達120萬平方米。管理層上周表示，今年以來合約銷售已達40億元人民幣，即已突破去年全年銷售額，難怪股價頭也不回，一味向上衝！

阿莊相信，近月配股集資進一步充實保利嘅財政狀況，下半年將加快收購土地嘅步伐，而母公司保利集團嘅持股量已攤薄至51%，未來或會透過向公司注入地皮，以增持股權。雖然保利現價已較近次配股價累積一定升幅，但現價市帳率只係1.5倍，與同類型股估值比較，仍屬偏低，因此亦別過早言頂。