尋日港股做好，唔少股份都見回勇，就連日前被高盛唱好的內銀股，亦見再度發力向上。加上內地亦有傳，存款準備金率將再度下調，以及央行放水達800億元人民幣，消息進一步刺激內銀股做好，當中以交通銀行（03328）升勢最勁，全日升3.68%，收報7.87元。
早前股價已調整唔少的新能源以及資源股，尋日表現亦唔輸蝕，同樣有回升之勢。況且，這些股份早前確實已回落不少，相信現階段反彈力度應該唔會嘢少，值得跟進一下。講開又講，尋日內地重啟IPO後的第二單IPO出爐，消息令內地券商股直線向上，唔排除今日在本港上市的內地證券股，都會有啲睇頭，不妨留意一下。
此外，日前內地商務部又表示，正醞釀多項刺激消費的措施，包括以舊換新、下調商業用電電價以及調整信用卡費率等，怪唔之得尋日內需股亦見異動，而正在招股的霸王（01338）以及361度（01361），反應亦難免熱上加熱。