試想，如果美元唔係A形走勢，先急升後急跌，澳元兌美元由0.87水平插到低見0.6，最近再還原基本步回到0.8水平，可以相信，中信泰富（00267）的榮智健亦未必會黯然落台。榮董意興闌珊，逐漸退出香港金融核心的舉動甚為明顯，近期先是減持中信泰富，再沽掉保利香港（00119）套現，但兩股未有因為榮董離去而失色，走勢都相當唔錯。

新人事、新作風，中信泰富新掌舵人常振明日前在股東會上，被問到上月賣掉北方聯合電子，係咪意味着將來會陸續出售非核心資產，新主席答得直接，強調未來集中特鋼、礦產及地產三線發展，令人聯想今次人事任命唔係短期性質，常振明確係會執靚盤數，畀上頭有個交代。

可以估計，國泰（00293）、兩隧最有機會成為中信泰富嘅套現首選，比較難取捨嘅仲係現金牛大昌行（01828），因為論業績穩定性同長遠增長潛力，大昌都係值得留低，尤其係中信的內地人脈，對大昌擴大內地發展的幫助，唔係一加一等於二咁簡單。

眾所周知，大昌行係本港老牌嘅貿易公司，經銷業務包括汽車、食品及消費品貿易，並經營物流業務，在內地、香港、澳門有相當基礎。過去四年，純利由2.43億元，拾級升至去年的5.63億元，雖然增長唔算係爆炸性，但勝在穩陣，或者○七年上市後，要向公眾交成績表有關。大昌行進軍內地的步伐顯得更為積極，期內，香港營業額累積大約升39%，可是內地升幅卻達到150%，佔整體收入比重亦由49%躍升至63%。

內需概念尚未反映

大昌行的內需概念，一直並未完全反映在估值身上，綜合分析員預測，估計今年大昌行賺6.36億元，市值38.5億元，市盈率只得六倍，同唔少內地零售、百貨類股份嘅二十甚至三十倍PE相比，平咗一大截。

經驗話，當人均GDP超過1,000美元，中產階級崛起，中產消費模式會開始流行，擁有物業及家用汽車的家庭數目會迅速增加，借用大昌行CEO葉滿堂的形容詞，是汽車市場潛力「浩瀚」，擁有不少歐日品牌代理權的大昌，也正朝着商機進發，準備擴大內地4S特約店規模及新增品牌銷售代理權。

如果筆者是常振明，會保留大昌行，因為特鋼、礦產及地產等生意表現都十分受周期性影響，反之，涉及內需的大昌行，營收穩定性高得多，縱使佔系內業績貢獻有限，但對綜合企業而言，這現金牛是不可多得的。