昨日阿莊推介嘅光大控股（00165），一度低見17.16元，阿莊以平均價4元悉數沽出走勢未如理想嘅中國製藥（01093），並以平均價17.5元買入4萬股光控。計及早前派發嘅股息每股0.2元，呢次買賣中藥獲利約1.5萬元。
中資電力股可吼
國家電力調度通信中心數據顯示，六月上旬全國發電量同比下降0.17%，降幅較五月份上中下三旬的跌幅（分別為3.9%、0.57%及5.66%）明顯收窄，而期間日均發電量上升至97.64億千瓦時，乃今年一月以來高位。電力需求持續改善，有助加強投資者對內地經濟復甦嘅信心，中資電力股首選華潤電力（00836）及華能（00902）。
昨日掛牌嘅旭光資源（00067），表現甚佳，高位曾見2.39元，收報2.38元，較招股價2元高出19%，成交5.57億元。反正早前熱炒嘅細價股，呢排都唔多郁，游資將焦點轉往定價留有餘地，且IPO比例唔高嘅新股炒作，可以理解。
次季以來股市轉旺，唔少上市企業把握機會集資。擁有上下游完善產業鏈嘅漁產捕撈公司太平洋恩利（01174），早前宣布2供1集資計劃，每股供0.6元，集資5.6億元，主要為應付旗下新加坡恩利控股（恩控）嘅供股計劃。
恩利持有恩控65%股權，另持有中漁42%股權。恩控已公布截至今年三月底止年度純利6.64億元，按年增長38%，若相比截至去年底首三季度純利3.02億元，見到末季度增長顯著，未受環球經濟低迷所影響。若恩控順利完成供股，集資10億元將有助減債，加上去年度盈利及經營業務現金流淨額顯著增加，未來尚可加快減債步伐。
至於中漁，今年首季純利4,372萬美元，下半年會增派更多船舶往南太平洋，拖網業務貢獻將進一步增加，而今年四月起秘魯實施獨立可轉讓配額制，亦有助改善旗下捕撈船隊及魚粉加工廠房嘅使用量及營運效益，前景樂觀。
減債能力逐步加強
另一方面，恩利位於青島嘅魚類加工廠已於今年二月投產，加工產能提升將帶來生產上嘅規模效益。此外，油價由高位顯著回落，亦有利恩利降低營運成本。
綜合各項因素，阿莊認為，恩利負債高係一個負面因素，但不至於蓋過所有正面因素，特別係公司盈利前景樂觀，減債能力正逐步增加。此外，來自內地市場嘅銷售佔公司總銷售額近半比例，內需概念亦可為估值增添溢價。
以目前市盈率不到四倍，息率逾6厘，即使係要為負債偏高嘅因素打個折，估值亦肯定唔講得上貴，反而眼前數據對價值型投資者有一定嘅吸引力，最快下月公司宣布年度業績之時，便可知此股是否超值！