港股尋日繼續整固，但萬八點關失而復得，亦都已經係月內第二次成功考驗萬八點承接，加上近日市況調整之時成交縮減，反映沽壓並非想像般大。睇嚟股市要向上突破，只欠東風。
正由於近日市況調整，大價股唔行，就連細價股嘅炒風亦有所收斂。炒家要每日發掘新嘅炒作對象，並唔容易。尋日新股旭光（00067）上市，逆市守住招股價，炒家有殺錯冇放過，結果成功突圍，隻股最高見過2.39元，全日成交達5.57億元，睇嚟又可以
實啲新股，話唔定會有意外收穫。
此外，尋日市場另一焦點，係翻炒資訊科技股，見長城科技（00074）、晨訊科技（02000）及晶門科技（02878）升幅都超過一成，短線可以跟勢留意吓中興通訊（00763）同中通服（00552）。
內地股市呢期交投亦靜咗，事關市場缺乏利好嘅新消息，加上股指仍然高企，部分投資者想先行獲利，亦可以理解。不過，嚟緊月底係基金半年結，相信班芬佬唔會放過機會做靚個組合表現，故不能完全排除月底前大價股再次起飛嘅可能性。