本文重點
舊年開始嘅金融海嘯搞到世界大亂，原來連恒基地產（00012）主席李兆基（人稱四叔）本自傳，出版時間都打窒咗，佢話咁嘅時勢啲朋友同香港大眾都應該無心機睇佢本自傳，所以就叫梁鳳儀暫停唔好寫住。唔知係咪近排個市升番唔少，四叔最近又叫佢復工繼續寫。
遇海嘯一度叫停
梁鳳儀尋日同太子講，四叔本自傳原本係大約舊年十月推出，但係咁啱當時遇着海嘯，四叔就叫停，諗住大家冇心機睇書（輸）。
家陣梁鳳儀就全速為本自傳埋尾，佢話本自傳已經寫到最後一章啦，主要係寫關於四叔嘅生活與前瞻。梁鳳儀話已經計劃今年七月至八月，執一執本書嘅內容，同埋做吓核對咁話，但係就無講實本書幾時可以出到版。
梁鳳儀仲同太子講，四叔好錫啲孫，成日得閒就買玩具畀佢哋玩。梁鳳儀話無論係男孫又好，女孫又好，只要四叔愈來愈多孫抱，就開心㗎啦，千億新抱徐子淇真係有排忙。