唔使問阿貴，都知邊個財長舉腳反對收緊救援力度，美國財長蓋特納是也。佢認為全球經濟仲面對緊挑戰，刻下唔係改動政策嘅適當時候。其實，相比歐亞國家，今次金融海嘯暴風眼嘅美國經濟，最壞時刻仲未見，樓價及失業率之外，優質按揭及消費信貸仲在變壞中，未有觸底回升迹象，俗語話解鈴還須繫鈴人，美國金融緊縮由樓價急瀉引發，樓價一日唔見底回升，銀行不斷接受拍賣，惡性循環又再推低樓市，經濟難言穩妥。蓋特納對八國聲明強烈反應，畀咗市場一大貼士，就係佢情願見到通脹，見到樓市泡沫再現，都唔希望半途而廢，醫到一半出院，也意味着年底前加息機會仲係十分之低。

孳息曲線利銀行業

長息高短息低，孳息曲線傳統上就對銀行財資部門有利，加上瑞信出報告唱好，滙控（00005）上星期成為升市主角，股價連升四日，高見69.85元收市，70元關口已近在咫尺。滙控三月初還在31元水平（相當於除供股權前的33元U盤價），輾轉股價翻一番，雖然同美國銀行或者花旗銀行等由低位升幾倍相比，仲係差好遠，但唔好忘記，在○八年金融海嘯來犯時，滙控的跌幅卻是相對溫和得多。

蓋特納聯袂伯南克的金融救亡行動，採取量化寬鬆政策，睇怕未有鳴金收兵部署，對市場擔心滙控美國信貸風險無止境惡化，對業績造成衝擊的預期，可望減低。歐洲方面，瑞信報告也力證認為區內監管當局，可能迫令銀行減少倚賴批發資金以及更積極改善資產流動性，對貸款比率唔高、存款基礎夠大、資產負債表中六成來自存款的滙控，也是相當有利，因為唔需要積極搶客吸納存戶，影響息差表現。

現價市帳率僅1.4倍

滙控市值1.2萬億港元，過去五年盈利介乎429億至1,486億元，今年分析員面對最大難題係英美貸款變壞程度到底有多惡劣。所以市場對滙控業績預測，落差很大，以港元計最壞假設要蝕60.8億元，最樂觀估計則有1,001億元盈利，目前預測的中位數是獲利520億元，換算成二十三倍市盈率。滙控盈利何時能夠重返千億？筆者作最壞打算，相信應是一○年下半年，或者一一年可實現，暫時睇唔到銀行業，在政府救援之後，受政策影響結構性收益減少的問題，○九年1.4倍市帳率的滙控，經驗告知絕對唔貴，尤其金融危機經已和○八年一同成為歷史。