內地A股重啟IPO，誠如阿莊上周所言，中央政府斷唔會「搬石砸腳」，以重啟IPO打散A股。有理由相信，重啟後首批A股IPO，喺定價上會留有餘地，讓市場對新A股重拾投資信心，從而達到吸回市場多餘資金嘅目的。
講開又講，早前阿莊曾炒過嘅四川成渝高速（00107），股價已經升到上3.05元，皆因大家睇好四川重建概念，加上該股回歸內地A股嘅步伐亦隨A股IPO重啟而變得逐漸明朗，相信炒作未完，短線會留意翻兜機會。再看投資組合，上周五阿莊以平均價90.5元沽出騰訊控股（00700），獲利約81,000元。套現所得，除會留意中國忠旺（01333）及四川成渝外，亦考慮睇位增持中保（00966）。
國策支持軟件產業
此外，上周工信部表示，軟件產業乃經濟社會發展嘅先導性、戰略性產業，內地將採取五項措施促進軟件產業進一步發展。基本上，呢番話係一再重申對軟件產業嘅支持，優質軟件股可以捧場。
金蝶國際（00268）剛剛透過中銀國際，以先舊後新方式，按每股1.37元，配售9,000萬股，集資1.2億元。金蝶係亞太區具領導地位嘅企業管理軟件及中間件供應商，喺在線管理及電子商務應用解決方案服務方面手執牛耳，喺內地市場已建立品牌優勢。其實，截至去年底止，金蝶手頭現金等值加定期存款達5.2億元人民幣，顯然並沒有迫切嘅集資需要，除非短期內物色到收購項目，又或者有基金睇好，敲門求貨。
金蝶現價市盈率十三倍，相信已反映首季業務受經濟增長放緩嘅影響，阿莊有感未來三個月，呢隻股好大機會有大動作跟尾，難得可以低於配股價入場，小注怡情，博中好消息出現，股價唔難踢上2元，穿1.25元止蝕。
阿莊又有好介紹，由今日開始，以後每逢星期一，本版將刊出《電話聽行情—人氣股榜》，資料係來自過去一周本報讀者透過打熱線電話：2795 8888 查詢股價的統計排名。本報讀者層面廣泛，排名顯示選股傾向穩健的大藍籌為主。至於逢周二至五刊出之《Money18 人氣股榜》，統計資料係來自每天網民透過Money18.on.cc，查閱股票報價、圖表及新聞次數計算排名。由於網民普遍較年輕及進取，不少熱炒細價股亦打入《Money18 人氣股榜》。希望上述兩個《人氣股榜》，能為讀者提供實用的投資資訊。