上周五，港股一開市就經已升穿19,000點水平，最高更曾見過19,161點添，一眾18,800點至19,100點嘅熊仔熊女，因此又再成為犧牲品。之不過，及後恒指愈睇愈唔對路，藍籌股股價率先回落，由升轉跌，恒指最低見過18,707點，但正當大家又以為大市已無力再上之際，尾市買盤又再見積極，恒指最終就以1點之差，突破了六月一日所創的近期高位18,888點，最終收報18,889點。
呢個點數，唔理係唔係有人故意造成，但大市真係似乎跌唔落。所以都係重申番之前嗰句，寧願冇方向，都無謂偏向任何一方，以防誤踩地雷！
講番個別股份，受豬流感（H1N1甲型流感）影響，部分藥業股仍繼續炒上。好似已獲授權生產甲型流感疫苗的海王英特龍（08329），於上周五就續有追捧，惟至今已累積一定升幅，相信利好因素已反映在股價之上，實在不宜高追。
市場資金再度流入汽車股，好似華晨（01114）以及長城汽車（02333），上周五就分別上升15.38%及9.93%，走勢絕不下於藥業股，加上又有汽車下鄉補貼以及銷售增長的支持，故不妨繼續留意。