本文重點
近期市況，與○七年比較感覺上是有過之而無不及，散戶陷入半瘋狂狀態，近期聽聞唔少對沖基金經理也加入即日鮮行列，以追補三、四月份唔夠膽跟上車的失地。有趣的現象是股市雖旺，但雷曼事件影響，透過認購基金單位入市的資金有限，唔少基金索性趁市旺，把一些○七、○八年承接的籠底貨、「植物股」，批畀有能之士炒高脫身，等基金可以鬆綁套現，加入當炒股行列，亦因為咁，近期唔少久欠成交的二三線股，突然有大成交嘅情況，跟着是勁炒一鑊等散戶接火棒，看官們尋寶時不妨留意，唔難有意外收穫，搭番轉順風車。
金融海嘯影響，液晶電視及電腦液晶顯示屏生產商冠捷（00903），首季業績大跌67%，賺1,488萬美元（下同）或者1.16億港元，與仲係太平盛世的○八年首季比較，業績水瓜打狗，非戰之罪，冠捷股價也反映最壞時刻已過的事實，業績曝光股價不跌反升7.6%
行業低潮期已過
筆者留意冠捷，始於過去一年信息產業部旗下的長城計算機不斷增持的消息，最新持有26.5%股權，與最大股東飛利浦持股27.25%，相差無幾，尤其後者近年刻意退出非核心投資，而出售品牌使用權的歷史任務亦都完成，可預期長城遲早成冠捷最大股東，信產部正式染指顯示屏市場翹楚。
看上冠捷，股東結構改變係原因之一，更重要當然係預期行業周期差不多走出艱難時期，不妨逐季看看冠捷的表現，○八年的四個季度，冠捷分別獲利4,541萬、5,140萬、3,134萬及虧損3,100萬，今年首季賺1,488萬，是谷底反彈，至於毛利率，過去四季是4.48%、4.58%、5.9%及3.37%，今年首季是4.6%，無論是賺錢能力抑或毛利，都可以看到冠捷的轉捩點經已出現。
管理層表示，首季季末，買家及分銷商開始重新補充存貨，顯示屏及電視面板價格亦見回升，內地家電下鄉計劃也帶來新需求。大行估計今、明兩年盈利逐步回穩，賺9,300萬美元及1.2億美元。冠捷歷史估值唔高，只是九倍左右，中國為其最大市場，料未來增長潛力也勝過歐美，現估值應不足以反映上述幾項利好因素，3至3.2元購入，中長線潛力唔錯。