資金重流大價股，港交所（00388）全日高位見129.3元，收報129元，升7.95%。中資金融股亦有資金流入，中國人壽（02628）升4.9%，報30.55元；中行（03988）及中銀香港（02388）孖寶分別升8.29%及6.76%，令人眼前一亮。環顧一眾內銀股，招商銀行（03968）走勢甚佳，可以視為炒落後首選。
唔經唔覺，國企指數已經突破11,000點，昨日收報11,033點，升5%。不過，請大家記住，國企指數升上11,000點樓上，沽壓會逐漸增加，故以孖展追貨嘅風險甚高，策略只宜小注跟勢炒落後股，且須嚴守止蝕。
唔單只股市，油價及金價亦見反撲，金股及油股受追捧，紫金礦業（02899）升5%、招金礦業（01818）升6%、中海油（00883）升3.2%。上周阿莊曾提及，有勢挑戰10元大關嘅中石油（00857），亦再升4%，收報9.41元，惟宜留意，若短線試破10元關不果，阿莊會選擇趁高食胡。
全球經濟正從金融海嘯打擊之下，逐步重納正軌。中央政府落重藥刺激經濟，內地經濟復甦進度最為突出，即使海嘯源頭嘅美國，金融市場亦已穩定下來。各地市場逐步恢復消費信心，若然呢個良好嘅趨勢於下半年持續，全球製造業有望迎來轉機。
談及製造業，次季以來，液晶體電視銷售增長趨勢明顯。有統計顯示，今年四月美國嘅液晶電視銷售量同比上升9%，而內地同月嘅液晶電視銷售量增長更達到77%，表現理想。
據面板廠商表示，由於原料玻璃基板嘅產量未有同步增產，喺原料短缺之下，下半年要因應市場需求增產，有一定難度。咁嘅環境，玻璃基板價格趨升，將無法避免。
間接受惠家電下鄉
唔講唔知，全球玻璃基板產量被美、日等廠商壟斷，內地嘅液晶體顯示屏需求不斷增加，但對於相關主要原料玻璃基板嘅供應卻不多。早於前年，彩虹電子（00438）旗下陝西彩虹電子玻璃動工興建全國第一條液晶玻璃基板生產線，才結束內地液晶玻璃基板完全依賴進口嘅歷史。今年四月，中國建材集團亦落實興建相關嘅生產線。
彩虹旗下首條年產量75萬平方米嘅玻璃基板生產線，去年九月正式投產，估計今年將全面反映投資成效，正好食正缺貨潮。另外，上月公司落實有關項目嘅擴建工程，將增設三條玻璃基板生產線，投資總額不少於17億元人民幣，年產量221萬平方米。
受惠「家電下鄉」，今年內地彩電銷售樂觀，加上公司拓展玻璃基板生產線嘅策略收效，業績看高一線。以現價計，往績市盈率不足十倍，難得近周股價連日回落，可留意低吸機會。若中期業績對辦，股價可向0.7至0.8元推進，跌穿0.45元先行止蝕。