恒指尋日重現強勢，而且一升就升超過700點，收報18,785點，資金明顯重投大價藍籌股身上，當中就以內銀股走勢最為耀眼，升幅由4至8%不等。好明顯睇到，現時資金輪流炒，今次就炒番啲大價股，故相信短期之內，細價股都要繼續抖氣，大家亦係時候轉一轉貨喇。另外，內地尋日就公布了五月份消費物價指數以及生產物價指數，雖然數據未為市場帶來驚喜，但上證指數就連續第三個交易日收高，且上破埋2,800點關口，走勢強勁。
講番市場消息，尋日發改委及財政部就表示，今年將補貼6億元人民幣，以加倍推廣高效照明產品，希望可擴大消費需求之餘，亦可推動節能減排，同時亦可促進相關企業的發展，惠及城鄉居民。此外，據知內地汽車摩托車下鄉操作細則，以及船舶工業振興計劃亦都經已正式出台，所以不妨留意番啲相關概念股，睇吓仲有冇得發圍啦。