提起冼國林，相信大家除會記起永亨財務外，仲會聯想到佢功夫了得，洪拳、太極、詠春樣樣皆精。但大家可能估唔到，現時為第一信用財務主席嘅冼師傅，原來文采都相當唔錯，好快就會出書。
見招拆招搞掂班MBA
冼師傅呢本書名為《笑看江湖》，太子起初以為係冼師傅行走江湖多年來嘅一些點滴，點知原來本書主要係講市場學、財務管理、人際關係等等，大概以四十篇散文形式結集而成，全部都係冼師傅親身嘅經驗。冼師傅話有一次被邀向讀緊MBA嘅同學演講，但竟然被質疑佢唔夠班，話大家都係MBA，點解要聽冼師傅講嘢？結果冼師傅就「見招拆招」話，佢係用自己失敗嘅例子去同大家分享。