港股昨日難逃一跌，恒指收報18,253點，跌426點。不過二、三線股繼續炒，只係升勢不及上周全面，不少股仔更在收市前撐唔住，好似志強揸住嘅創新能源（00702），收報0.39元，跌逾3%，再觀察多一日，如0.4元未能企穩，寧願先沽出，免錯失其他入市機會。昨日推介的中國水業（01129）開前市停牌，若然又係批股，只要批完唔大跌，志強計劃復牌追貨，因近日好多股仔都係配股後才開車。
日前中國雲錫礦業（00263）公布，以先舊後新方式，以每股0.228元配售共1.7億股，集資3,770萬元。配股完成後，中國雲錫股價在0.25元下整固後，近日走勢好轉，重上0.25元，睇樣似再開車。
中國雲錫礦業自○七年起，加速收購貴金屬資源，並且成功以每股作價0.54元，引入大型國企中國雲南錫業為策略性股東。集團早前成功以6.1億元作價，收購了持有廣東省陽山礦業的深圳錦繡德龍。收購完成後，公司的資源規模迅速壯大，對未來發展有莫大幫助。
根據中國公認會計原則，截至○八年底止未經審核合併管理帳目，深圳錦繡德龍的總資產值為15.6億元，淨資產為12.3億元，中國雲錫僅以約一半價錢進行收購，令本身資產淨值因此大增。加上現價只接近策略股東入股價一半，現價買入，目標是股東返家鄉，志強亦贏大鑊。