尋日恒指走勢出現一個倒V，加上藍籌股走勢偏軟，此情此景，實在令人擔心港股及後將無力再上，出現掉頭回落的情況。之但係，尋日細價股仍繼續炒個不停，二十大升幅榜中，排喺最尾嘅一隻都有22.55%嘅升幅。再一次證明，資金仍然游走於細價股身上，炒股唔炒市的策略繼續可行。
講番市場消息，尋日內地財政部及稅務總局頒布《關於進一步提高部分商品出口退稅率的通知》，表明已獲國務院批准，提高部分商品的出口退稅率，並將於本月開始實施。翻查資料，今次已是過去十個月內，內地第七次上調出口退稅率，且是次退稅範圍以及幅度較過去六次都要大，故尋日相關出口股齊齊被炒上。
值得一提的是，今個禮拜內地就會公布五月份幾項主要經濟數據，包括生產物價指數以及消費物價指數。之前好多人都話，內地經濟開始回暖，又話內地今年第二季的GDP將較第一季大幅增長，故今次公布的數據，實在值得投資者留意。而在數據出爐之前，尋日上證指數就升14點，收報2,768點，到底經濟數據能否刺激A股再度上揚，咁就要好好留意喇。