近排美國嘅數據相當反覆，前晚嘅數據大致上都唔好，美國私人企業五月份流失就業職位達53.2萬個；五月份非製造業指數雖上升0.3至44，但低於市場預期；四月份工廠定單上升0.7%亦低於市場預期。經濟數據較差，引發美元上升，油價和金價則齊跌。不過，市場氣氛明顯仍然樂觀，所以遇上好數據股市就飆升，但見到差數據則跌幅不大，尋晚道指跌65點，只算小意思。

講開數據，中國尋日公布之五月份發電量就備受矚目，發電量成重要指標，可謂中國獨有之現象，皆因其他由官方公布之指標，大多令人懷疑，尤其GDP有很大「發水」成分，今年首季各省市公布的GDP就相當懸殊，有笑稱是因「誠實度」不同。至於發電量則冇花冇假，尤其中國的發電量有八成係用於工業用途，所以變成更具代表性的經濟「寒暑表」。

食油業務轉虧為盈

唔單止外國人戴有色眼鏡，連電監會前副主席亦話，一些地方上報的經濟數據值得懷疑，好似某個西部省份首季用電量下降9.9%，但經濟增長則達10.8%，雖話係災後重建拉動GDP，不過重建唔通唔使用電？

中國物價逐步回落，最慘係豬肉價仲低過兩年前未升之時，但食用油近期普遍回升15%，但咪以為中國食品（00506）嘅食油生意有好大着數，因為其實只係反映成本上升因素而已。不過，證券行對中食評價高咗係不爭之事實，皆因除食油生意可轉虧為盈之外，糖果生意亦大有轉機。

中食盈利兩大支柱：紅酒同可樂包裝業務仍然表現出色，食品股雖然係防守性股份，但睇康師傅（00322）同統一（00220）除咗首季業績好之外，股價的升幅亦令人滿意。中食亦唔失禮，三月開始由2.7元直升至4.8元，但各大行睇佢嘅目標價都在5元以上，睇嚟仍有上升空間。不過，基於現時市況值博率下降，阿莊嘅目標價只定係5.4元，以4.4元為止蝕價位。