本文重點
中國人嘅足迹遍布世界各地，法航嗰架死亡班機，咁唔好彩有幾個中國同胞喺上面？太子聽聞，失蹤者之中有一人用咗24萬人仔買保險，若佢真係遭遇不測，賠額竟然係保額嘅四十倍，高達960萬人仔，將創下內地有史以來嘅最大個人保險賠償。
24萬保費賠40倍
呢份咁令人咋舌嘅保單，係同中國財險（02328）持有14%股權嘅人保壽險買嘅。咁高賠額嘅保險喺香港見怪不怪，但喺內地又的確唔常見，除非買家係好有米之人喇。但原來保單嘅條款係好奇怪。
呢份保險係分紅年金產品，保險金額只係24萬，但係唔同死法有唔同嘅賠償，例如喺保單生效一年後因病身故或全殘，可獲保額十倍嘅賠償；喺一百八十日內因非空難因素而身故或全殘，可獲二十倍賠償；喺一百八十日內因空難身故或全殘，可獲四十倍賠償。