阿莊上周亦曾講過，短期恒指較大阻力位喺18,800點，誰不知話咁易就破。目前幾可肯定，恒指波幅區已由11,000至16,000點上移。由於早前恒指喺16,000點乃三頂，確認突破後，這個便成新升浪嘅主要支持位。照計，喺16,000點呢個新起點，向上望三、四千點，先至具足夠水位讓大戶作部署，近期升市便印證了呢個觀點。
升上萬九見好要收
不過，由於恒指突破18,000點升勢過急，短期可能要抖抖氣，但到底調整會係即日完成抑或要抖幾日，就真係得個「估」字，惟有一點可以肯定嘅，係「花無百日紅」，若恒指升逾19,300點，投資者應該懂得見好即收，逐步減持股票，待大市整固過後，再作入市考慮。
回說阿莊嘅投資組合，唔經唔覺，騰訊（00700）已升到85至86元水平，參考最近高盛嘅研究報告，指騰訊股價已升逾其原定目標價85元，故將其剔出「確信買入」名單，但就維持給予「買入」的評級，目標價上調至92元。
阿莊一直苦候加注騰訊的機會，惜未有遇上，考慮到股價「破百」需要有重大利好消息配合，若冇特別消息，升逾90元會考慮先行食胡。
中保果然有料到
至於上周阿莊指「有買貴冇買錯」嘅中保（00966），昨早已見異動，阿莊裙拉褲甩趕入場，亦只係掃得四萬股，平均價14.9元，諗住15元樓上可以睇定啲，點知「頭也不回」，最高見16.5元，收報16.32元。事實上，中保股價升，對於吸引民安（01389）股東接受換股方案，事半功倍。若作短炒，可待升至17元水平獲利。
中國人壽（02628）一如所料起勢追落後，由於昨早跟進咗中保，所以沒有追入國壽，但走勢冇令人失望，收報30.1元，升6.3%，而尋日提及嘅兩隻國壽牛仔62971及62861，同升逾三成。
踏入下半年，為確保實現「保八」目標，中央政府勢必加大力度刺激消費。家電、汽車等受海外市場不振打擊，且存在供過於求嘅行業，將繼續獲得中央政府嘅補貼支持。
去年聯想（00992）業績錄得虧損，負面因素已作反映。反而今年內地擴大「家電下鄉」範圍，電腦行業亦會受惠，公司已因應市況擴大內銷比例，相信有助業績止跌回穩。展望明年，視窗推出新版本，亦有望引發電腦升級潮，公司過去積極喺商業及個人電腦市場布局，可望逐步體現效益。
由於預期業務已過低潮，近期大行對聯想嘅評價亦有改善。再看其股價，喺3元邊整固過後，隨時又再開車，可以買貨坐定等收成，如無意外，今轉股價上望3.8至4元應該冇甩拖！