踏入六月第一個交易日,內地股市同港股齊齊做好,上證指數再度升穿2,700點水平,恒指最終亦收報18,888點,咁多個「發」字,望落去真係幾好意頭。
發改委宣布,由昨日起將汽油及柴油價格每噸調高400元人民幣,消息刺激一眾石化石油股做好;至於上個禮拜已呈強勢的中資金融股,尋日亦都繼續上揚,當中表現最好的是招商銀行(03968),全日升逾7%。不過,若要論全日升幅最勁的,就不得不提內房股,當中走勢較落後的星獅地產(00535)以及合生創展(00754)等均齊齊打進二十大升幅榜中。
其實大市咁強,都係因為熱錢充斥的緣故,既然如此,大家都無謂同「錢」鬥氣,最好係順勢而為!
關於內地創業板開張的消息不絕,尋日有內地消息就指,在蘭州就有五十家規模不大的牛肉麵店,擬組團登陸創業板。就連麵店都咁熱衷於上市,相信日後內地創業板正式登場時,場面將相當熱鬧。