本文重點
尋日華創（00291）宣布佢哋個執行董事兼副董事總經理鄺文謙同公司秘書李業華辭職，而家陣搞緊私有化嘅華潤微電子（00597）非執董嘅黎汝雄，同埋集團首席法律顧問許亮清就接替佢兩個嘅職位，今個月底生效。
黎汝雄接任華創執董
太子傳媒老友同鄺文謙、黎汝雄相熟，兩個都係實力派人物，亦都效忠咗華潤系十年八年，今次鄺文謙辭職，的確令市場覺得有啲突然，事關佢上個星期仲出席緊股東大會，好有耐心咁答緊小股東同記者問題，一啲要走嘅迹象都無。但通告就解釋話，佢想休息一輪之後，再向其他方面發展喎。老友忽發奇想，早排個市傳得好行話中信泰富（00267）會喺紅籌公司中挖人去做佢哋董事總經理個位，唔知係咪有關係呢？
傳媒老友打電話畀黎汝雄，問吓佢即將上任嘅心情，點不知佢原來放緊假喺澳洲同老友食緊飯，好坦然咁講咗句「呢啲都係正常調動」，仲話返嚟香港再搵老友傾偈喎。通告內容仲提到黎汝雄有權收取嘅月薪約20.6萬元，而○九年度獲批嘅董事袍金每年係8萬蚊。