本文重點
美股在五月最後一個交易日，道指升96點，報8,500點，完成連續三個月錄得升幅的壯舉，全個月累計則升3.3%。留意到近期美股升勢，有迹象由過渡黑暗期的金融股轉至由資源股接棒，主要係市場開始關注美國政府開動印鈔機救經濟，長遠對美債償付能力有懷疑，擔心通脹捲土重來。上星期，金價升至980美元一安士的水平，直逼年初的1,007美元高峰，熱錢轉投資源股，也令資源股佔相當比重的道指升勢持續。香港人鍾意叫250日線為牛熊分界線，但美國較多人採用200日平均線作為中長期走勢指標，現阻力位於8,780點，睇嚟今浪試衝阻力的機會極大。
港股短短日子內連破萬六、萬七，甚至萬八點關，而綜觀三月展開的升市，唔單止唔少散戶大跌眼鏡，史提芬所知，即使傳統基金唔少亦都睇錯市，持現金比重過大，出現嚴重跑輸大市情況。大孖沙為追回失地，一搵到有成交有故事支持的股份就蜂擁而上，令近期動輒出現一日升兩三成的暴動股。
上星期留意到，晶門科技（02878）股價單日狂升兩成五，升0.105元，報0.52元，並錄得接近6,200萬股的大成交。睇番過去兩個半月，晶門成交一直唔弱，但是和乏善陳足的業績，卻有着鮮明的對比，尤其近年疲弱的營運表現，分析員也少看這股。自去年七月至今，再無大行為公司撰寫報告。
晶門從事的是手機液晶體顯示集成電路的設計，市場過往一向視晶門與摩托羅拉關係友好，但有指由於摩記本身新手機表現麻麻，加上關係有變，令晶門去年業績大走樣，蝕掉1.81億港元（約2,340萬美元），與○五年高峰期的5.91億元盈利，可說是雲泥之別。
電子消費品市場回暖
最近，晶門管理層表示，三月接單有改善，但和去年同期比較始終有距離。在這種情況下，晶門可以炒到13億元市值，股價兩個月之間由0.2元翻兩番去到0.52元，實在耐人尋味。
大孖沙突然大炒晶門，以筆者見解應歸納為三個原因：一是電子消費品最壞時間應該已過，從接單由去年十二月及今年一二月回升；其次是內地對3G手機研發如火如荼，為行內頗具名氣的晶門提供新機遇。最後，無負債兼手持8.3億元淨現金，財政仲係安全得很。現時押注晶門，既可賭復甦，又可博其大手派息！即使有點投機成分，但0.5元附近，仍有一試條件。