本文重點
上周國務院宣布，自五月廿五日起，各行業固定資產投資項目將根據新嘅「最低資本金比例」執行，其中保障性住房和普通商品住房項目嘅最低資本金比例為20%，其他房地產開發項目嘅最低資本金比例則為30%。呢個政策，變相進一步緩解了地產發展商嘅資金壓力，加快推動項目進度，令市場供應增加，發展商可以多賣樓，消費者又可以合理價買到樓，其實係兩相宜。
此外，上周初阿莊指神州數碼（00861）股價雖然累積唔少升幅，但估值尚不算昂貴，仍有上升空間，走勢果然對辦，股價由4.8元水平，升至上周五高位見5.4元。
雖然阿莊未有跟進神數，但上周五就跟進了另一隻推介股份，就係上周三見報嘅新股中國忠旺（01333），以平均價7元買入10萬股，全日高位做7.2元，收市報7.15元，升2.1%。
誠如阿莊所指，喺今次大升市之中，兩大中資保險股─平保（02318）同國壽（02628）實在係大落後。阿莊嘅組合本身已持有平保，再睇隻國壽，上周五收市報28.25元，尚未突破上月初高位29.7元，但同期國企指數經已突破一萬關，上周五收報10,428點，可見國壽股價短線極具炒落後誘因。
股價滯後，相信與國壽保費收入連月下降有關。由於去年五至八月，國壽保費仍在高速增長，故阿莊估計，未來一季嘅保費收入同比變幅仍有壓力。不過，呢個因素應該已反映喺股價表現上，更何況影響國壽業績表現嘅因素，保費收入屬其次，投資資產公允值及總投資收益嘅影響更大，而這則繫於A股市場表現。
A股資產水漲船高
今年以來，內地A股反覆回揚，以滬綜指為例，累計升幅已近五成，偏偏國壽同期累計升幅僅約兩成。要知道，國壽揸住唔少A股資產，A股市場回升，國壽嘅資產價值水漲船高，冇道理股價可以咁落後。
既然短期大市已確認向上，阿莊周內亦會留意跟進國壽正股嘅機會，若對其牛證有興趣，現有選擇亦唔算太多，國壽比聯牛62971略嫌街貨多且日子不長、退而求其次可睇國壽法興牛62861。