金融海嘯震散環球嘅金融機構，不過滙豐銀行都算硬淨，喺最新發布嘅BrandZ全球最具價值品牌排行榜之中排第四，獲得最高品牌價值嘅國際銀行，大拿拿值成191億美元（約1,490億港元）。
咁頭三名係咩呢？太子睇真啲，中資銀行包辦晒頭三甲位置，分別係工行（01398）、建行（00939）同中行（03988）。雖然比三大中資行騎住，不過滙豐都已經好開心，亞太區行政總裁霍嘉治都話，報告證明唔係所有銀行都不外如是，反映滙豐係別具實力。
BrandZ專門調查消費者同商業用戶嘅品牌偏好，規模係全球最大。太子再研究吓個名單，發現工行個標誌竟然用咗子公司工銀亞洲（00349）嗰個，睇嚟班外國人都要認番清楚佢哋先得！