本文重點
華創（00291）董事總經理陳朗尋日喺佢哋股東會嘅會後話，家陣嘅市場環境你真係估佢唔到，明明經濟大環境係差嘅，但佢哋嘅啤酒業務就零零舍舍跑出，銷售量升到「嘭嘭」聲，佢仲話可能係因為經濟唔好，啲人要借酒消愁啩？
雪花啤銷量勁升25%
公司嘅副董事總經理鄺文謙跟住就話，華創旗下「雪花牌」啤酒今年第一季嘅銷量大幅升咗成25%，比起同行其他品牌嘅銷售都高，要今年成為全球銷量最多嘅啤酒品牌，應該無乜難度。
記得喺九十年代時，太子去過東北長春市，當時東北人好鍾意飲雪花啤，亦都只係東北地區先有得賣，東北人好飲得烈酒就係人都知，但啤酒佢哋就好鍾意飲雪花，買親都係成箱成箱。東北朋友最鍾意同三五知己，成箱成箱咁「乾」！
十幾年後嘅今日，雪花已經畀華創收購咗，仲要咁好賣，雖然唔知真正原因係乜，但東北人一定貢獻咗唔少，佢哋對呢隻牌子真係好有感情。