正正由於指數股飆升，資金從股仔流出，致使昨日股仔表現回軟。不過，當恒指挾穿萬八點，升勢暫緩，則不排除下周股仔抖氣過後又再接力向上。
香港特區政府前日公布推出新一輪紓困措施，涉及金額達168億元。阿莊認為，諸如此類嘅措施，就如「炒雜燴」，缺乏新意，雖然話有總好過冇，但唔好作過分憧憬。
早前國家電網中心公布嘅數據顯示，五月中旬用電量同比下跌0.6%，較五月上旬嘅跌幅3.9%大為收窄。雖然有指比較基數可能受去年四川地震影響，但觀乎今年五月中旬，內地沿海多個省份用電量恢復正增長亦係一個正面趨勢，畢竟若然內地經濟真係回暖，用電量唔應該長時間與GDP增長背馳。呢兩個月大升市，電力股表現落後，可高度關注。
手機業務將成亮點
有別於2G時代，近年內地啟動嘅3G產業中，內地廠商所佔嘅份額明顯提高。至今為止，有關TD嘅招標尚未完全結束，但中興通訊（00763）所佔嘅綜合比例已稱冠。雖然市場可能擔心，3G機站布放大致完成，今年中興來自相關業務嘅貢獻可能不及去年，致使股價一直停留喺24至25元水平。但阿莊相信，今年中興嘅3G手機業務增長會明顯加快，加上海外業務持續增長，實毋須過於憂慮。
以今年首季為例，全球手機銷量同比下降13%，其中諾基亞及摩托羅拉、愛立信嘅手機銷量分別下跌20%、46%及35%，但中興季內嘅手機銷量卻不跌反升，升幅超過三成，達到一千萬部，手機產品收入同比增長22%。
本月中旬，中移（00941）就6億元TD聯合開發項目招標，中興成為唯一一家同時取得「旗艦寬帶互聯網手機」和「低價3G手機」兩大項目嘅內地手機品牌，另公司與中移首款3G深度定制手機U210，亦已喺北京、上海、廣州、天津、瀋陽推出。故可以預期，手機業務將成中興未來一、兩年嘅另一亮點。
過去兩個財政年度，中興都增派股息兼送紅股，市值快速擴大。若今年上半年業績對辦，估值尚有上調空間，股價有勢再叩30元大關，可耐心靜候突破。