本文重點
【本報訊】私募基金TPG入股達芙妮（00210）嘅消息日前先至曝光，但係原來聽達芙妮主席陳英杰講，佢哋同TPG合作咗兩年，而且非常推崇TPG董事總經理馬雪征（Mary），覺得Mary係一位出色嘅人才，好希望同TPG合作，邀請佢哋入股公司。
力邀TPG入股
Mary喺聯想（00992）做CEO時，成績有目共睹。太子好記得，佢係國際雜誌「最具權威女性」榜嘅常客，當年聯想購併IBM時，佢都有好大功勞。之後佢去咗TPG做董事總經理，適逢TPG亞洲投資團隊啱啱經歷人事調整，兩位合夥人離職，而投資達芙妮係變動後，TPG第一單交易。
陳英杰話，Mary喺電腦分銷業經驗豐富，佢嘅零售經驗有助公司發展鞋類零售業務，而且大家都睇好中國嘅消費市場。達芙妮近年積極轉型，舊年仲將公司名改做「達芙妮」，拓展分銷渠道，依家又有TPG支持，希望佢哋好快有成績畀大家睇。