近兩個月，本地樓市氣氛向好，究竟係發展商為出貨而營造出嚟嘅現象，抑或樓價自去年末季調整以來，已到咗具承接嘅水平，吸引用家入市？阿莊亦搞唔清楚。不過，從本地物業代理統計嘅數字顯示，今年內地投資移民投入本港樓市嘅資金超過30億元，再加上觀塘重建項目，賠償金釋放40億元嘅購買力，難怪無論新樓抑或二手中小型物業，樓價表現硬淨，與經濟表現嘅關連性下降。
地產股首選新地
有了新錢流入，加上大銀行昨日又再大幅調低存款利率，存款幾近冇息收，迫使更多存款流入樓市買「磚頭」保值，除非下半年樓宇供應明顯增加，否則都係嗰句：樓價易升難跌。喺地產股之中，阿莊正留意新地（00016），中線有望挑戰100元大關，向下50日線支持喺76元。
昨日阿莊表示，會考慮喺除淨前加碼中國製藥（01093），昨日遂以平均每股4.48元，增持100,000萬股，收市報4.5元。此外，昨日本欄推介嘅聯想（00992），一如所料重上3元樓上，高位曾見3.16元，收報3.11元，升8.36%。
正正由於這類實力中資股一係唔郁，一郁波幅都唔錯，而且揸得安心，所以阿莊繼續着眼落後中資股，今日就睇睇股價正醞釀突破嘅南車時代（03898）。
諗起南車時代，主要有見其母公司中國南車（01766）近日走勢現突破，昨日一度高見4.49元，收市報4.42元。做「阿媽」嘅經已向上突破，有機會帶動做「阿仔」嘅南車時代發力追落後。
雖然今年首季，內地經濟尋底，但南車時代首季業績穩步上揚，期內營業額5.16億元（人民幣．下同），同比增長14.78%；純利7,960萬元，增長14.36%；每股盈利7分。
購併提升競爭力
隨着中國致力拓展全國鐵路網絡，機車嘅需求增長趨勢明確，無論係做機車嘅中國南車，抑或做機車電氣系統嘅南車時代，都可以受惠於產業好景。再講，去年十月南車時代收購了從事研製及銷售電力半導體器件及組件嘅加拿大多倫多交易所上市公司Dynex Power 75%股權，藉此建立一個海外業務發展和融資平台，並使旗下產品結構完整化，大大提升競爭力。
未來，公司產品除應用在鐵路、城軌之外，還可力拓風電和電力汽車等行業，相信待兩者業務整合過後，相關嘅利好因素，將逐步反映喺業績以及股價表現上，值得憧憬。
觀南車時代嘅股價走勢，上月下旬急升上12元後，便進入調整期，10元水平見承接，昨日收市報11.3元。相信若然呢架「車」再撻着，目標可見13.5元，向下宜守10元關。