尋日恒指表現麻麻，全日波幅不足250點，之但係細價股的升幅就真係大到你唔信，收市埋單計，好多股仔都有逾兩成升幅，有些更加係臨尾五分鐘才被掃上，炒風咁熾熱，相信短期派對仍未完結。
繼日前石油石化股炒上後，尋日資源及新能源股接力向上，皆因繼早前有傳新能源扶持政策將出台後，尋日又再有消息指，國家相關部門今日將再召開新能源會議，因此中國風電（00182）全日升16.3%；陽光能源（00757）亦升14.2%。至於資源股方面，雖然部分大價資源股已見炒上，但一些細價資源股走勢仍然相對落後，相信遲早會被炒家發掘。
之前講過，在現今的資金市底下，真係千祈唔好輕視國策嘅威力，好似尋日受惠國家鼓勵汽車同家電「以舊換新」，一眾相關概念股都被大幅炒上。之不過，由於政策所帶來影響，未算即時性，故尾市時見升幅收窄，唔排除今日會有回吐。