銀行講開源節流，大家都會諗到加收費同裁員，市場人士話某本地大錢莊，以往對員工都好「忍手」，好少裁員。不過，近期突然「公事公辦」咗，同其他行做法冇乜分別，好幾位同事已經「陣亡」，唔使再返工。
查單突然「公事公辦」
話說大家要跑數時，如果個客唔止買一張單，銀行員工往往同啲熟客傾好，將啲單簽定先，到時候再呈上去，咁條數就比較均勻，避免「三更窮，五更富」嘅跑單生活。
不過，依家本地錢莊突然「公事公辦」，查番啲客嘅詳情，發覺有啲客喺香港同外地嘅時間，同簽單日子不符，咁就會處分同事，輕則扣咗張單嘅表現分數，重則「係咁先」。最特別係張單仍然有效，錢莊錢就照賺，大不了搵個客補簽番。