本文重點
股市升勢欲罷不能，中資股繼續輪流炒作不同板塊，昨日輪到汽車、石化及鐵路基建股。此外，股仔亦不甘寂寞，交投明顯增加。究竟炒到股仔，是否預告升市已屆尾聲？筆者亦冇大智慧，只有提高風險意識，並盡量走短線。
近周唔少已放入「雪櫃」多時嘅二、三線股，輪流起動，由於價位細，波幅大，所以吸引散戶追逐。炒呢類股，唔係考你錢多，亦唔係考你對隻股有幾多認識，最重要是有「勇氣」，見勢就「衝」，一有兩成以上利潤，就分段沽貨離場。不過筆者始終認為，炒股仔注碼唔能夠太大，且風險高，未必人人受落。故今日股膽着眼落後工業股，取其穩陣，且迎合近期資金不斷發掘落後新面孔的潮流，今日就揀申洲國際（02313）。
食正內地消費商機
申洲專做針織服裝製銷業務，由於近年公司成功新增多家著名運動品牌客戶，故業績穩步增長，去年純利6.99億元人民幣，增長逾七成，內地市場佔收入比例穩增，正好食正內地消費大旺的商機。
據內地體育用品零售商指，近期銷情暢旺，存貨減少，產品打折壓力下降。這個訊息，對類似申洲這類製造商屬利好。昨日申洲收報3.23元，市盈率五倍，派末期息每股0.2元，將於本周五除淨。本月初有基金增持，可密切留意，現價上車，連息計目標利潤睇15至20%。
再拖冠捷（00903）作腳，本月以來走勢凌厲，近周股價回軟，但穩守10日線2.9元水平，似乎正要醞釀突破，食得唔好嘥，目標睇3.5元。另一腳搭聯通（00762），股價整固已近兩周，昨日再現升勢，相信今轉可上試10.5元阻力位。