以往話願賭就要服輸，但充滿高智商腦袋的華爾街，傳統說教明顯唔適用，能夠技術犯規，取巧地輸打贏要，至算叻仔！自AIG蝕到嘔仲向高層發放花紅，激到奧巴馬政府急急立例，勒令領取救援的金融機構員工薪酬要設限，花紅就要徵收懲罰性稅收。去年唔少諗住有便宜唔使洗頸，向華府伸手的金融機構，都急急想將錢還番畀政府。前晚高盛、摩通及大摩都話已經向華府申請，提早償還高達450億美元的援助金。
華爾街群妖現形
AIG事件，其實都係一面照妖鏡，一照就知邊一間係「詐死」、邊間係真傷，至少美銀就無話短時間內可清還畀政府，旗下美林高層近日仲靜雞雞大幅加薪四成，以免年終花紅因政府徵稅而水瓜打狗唔見一截。
資金市莫估頂，恒指又再升521點，報17,544點，成交增至841億元，唔少基金愛股估值開始偏高，故近期資金明顯流向二三線甚至蚊型股。財技高超的長盈（00689）將手上殼股金科數碼（00922）以每股0.115元先出售7.72%權益，再配售涉及15.44%權益的配售選擇權，即時套現現金唔多，連埋股權都係1,350萬元。金科股價因為借殼憧憬狂升六成三，表現上接貨者贏到開巷，但唔好唔記得手頭仲保留三成五金科、市值單日由7,500萬元狂升至1.22億元的長盈，至係最大得益者。
盈利持續三級跳
愈來愈多證券行睇好內地經濟有可能出現V形反彈，CIMB睇好內地製造業及出口復甦，推介葉氏化工（00408）、勤美達（00319）及龍記（00255）等三隻工業股。近期留意到信義玻璃（00868）走勢唔錯，由年初2元起步，穩步上揚，昨日收報5.66元，創十一個月新高。
信義主要生產汽車玻璃、建築和浮法玻璃，銷往中港兩地，內地汽車業近兩年競爭愈趨激烈，原先預期難免對上游零部件需求構成影響，但結果剛好相反，車廠外判比例增加，反而惠及信義，回顧○五至○八年度，銷售量由13.8億元，三級跳至38.9億元，盈利也逐年上升，由2.6億元穩定升至7.09億元。今年中央通過振興汽車業政策，並推行汽車下鄉計劃，以刺激汽車市場需求維持增長，這亦間接幫助到信義這類零部件供應商，銷情保持興旺。
大行預測信義今、明兩年盈利分別為9.36億元及10.9億元，預期市盈率9.7倍及8.7倍，論估值或許同業浙江玻璃（00739）更低，可惜後者往績飄忽，而且在科研投入、開發高毛利產品方面，信義的表現對芬佬而言更具說服力，兼且估值唔高，趁資金在低PE工業股尋寶，信義有條件改寫今年高位。