內地真係每個月都有利好政策出台，尋日輪到石化產業調整和振興規劃，石化股應聲上揚，中石化（00386）、上海石化（00338）及儀征化纖（01033）升3.7至9.8%不等，但經驗告訴阿莊，石化股炒風短癮，宜把握好消息出貨嘅機會。
阿莊喺上周五掃入嘅中油香港（00135），一如預期升上5元樓上，昨日高位曾見5.26元，本周初已表明，若升上5元樓上，會考慮先走一轉，昨日遂以5.2元沽出的10萬股，獲利6.6萬元。順帶一提，組合中中國製藥（01093）派發末期息每股0.2元將於明日除淨，今日若有好位，會考慮加注搶息。
多管齊下推動內需
另外，內地傳媒報道，國務院研究部署推出汽車、家電「以舊換新」計劃，一來有利於擴大消費需求，二來有助於提高能源資源利用效率，減少環境污染，加快實現節能減排嘅目標，故見昨日汽車股有買盤追捧。吉利（00175）、駿威（00203）、華晨（01114）、東風（00489）及長城汽車（02333）全線做好，其中以長城汽車表現最佳，升幅達13.64%。
講開又講，為咗確保下半年經濟持續復甦，中央政府正透過各種方法，加大力度推動內需，其中一項舉措，係自六月起喺包括上海市在內嘅四個試點，推出消費金融服務。
目前，內地消費貸款佔總貸款額嘅比例只有一成多，主要側重喺物業、汽車及信用卡業務。有國際市場統計顯示，未來十五年，內地消費市場將呈高速擴張，並會發展成僅次於美國及日本嘅消費市場，相信喺呢個過程中，消費金融會擔當積極嘅角色。據講，即將試行嘅消費金融服務，不涉及物業及汽車貸款，特色係審批快、免抵押嘅個人小額消費信貸，應用於旅遊、教育，購買家居、婚慶用途等領域，而主要用家會係年輕人。
受惠國策升勢未完
阿莊相信，針對時下內地年輕人市場，電子產品係必然嘅消費類別，就如電腦。呢項新發展，正好配合聯想集團（00992）擬擴大內銷嘅發展策略。
本月以來，聯想股價升勢加快，近周股價調整，一直守穩喺10日線，相信整固後，好戲在後頭。事實上，類似「家電下鄉」及「消費金融」等新政策，幫了聯想一大把，加上海外消費市場有回穩迹象，料反彈浪尚未完結。明日公司將宣布末期業績，股價已反映業績大倒退嘅因素，若業績公布後股價反衝穿3元，可以跟進，目標挑戰3.6至3.7元，向下宜守2.5元。