中國移動（00941）尋日開股東會，董事長王建宙除咗猛咁畀人問佢點睇入股遠傳電信單「刁」嘅成數外，仲有一個老問題就係王總佢老人家幾時退休嘅問題，王總嘅答案當然都係嗰個指定答案，就係話每個人都需要退休，只不過佢退休唔係自己決定，所以無法話畀大家聽佢幾時退休，但就應承大家一知道就會第一時間通知大家。
由於尚未落實退休，所以王總尋日都—如以往重選董事，根據投票表決結果顯示，有99.7%嘅票數贊成王總連任董事，其他董事同獨董都獲大比數票數通過連任，唯獨副董事長張春江嘅連任，竟然有5.14%嘅票數反對，計落有成9億幾票㗎，絕對唔算細數目，就連中移公關都覺得有少少意外。太子估，對於之前網通嘅小股東來講，張總就梗係廣為人熟識，但自佢加盟中移以來，張總未曾到過香港見中移嘅小股東，所以尋日有9億幾票反對佢連任董事，都唔會覺得太出奇。